ج 2 اخت مراتي
زهرة الربيع
وقفت ورا الباب وقلبي بيدق بعنف
المرة دي مكنتش داخل أتصنت بدافع الفضول
كنت داخل أنقذ بيتي
نور كانت متفقة معايا إنها متواجههاش ولا تبين إنها عرفت أي حاجة
سمعتها سارة وهي بتقول بصوت كله حنية مصطنعة
مالك يا نور شكلك مبسوطة النهارده
نور ردت بهدوء
الحمد لله أحمد بقى مهتم بيا أوي اليومين دول
ضحكت سارة ضحكة خفيفة وقالت
طبيعي يمثل عليكي يومين تلاتة عشان يطمنك
لكن الراجل اللي قلبه بره البيت عمره ما هيتغير
نور سكتت
وسابتها تكمل
سارة قربت منها وقالت
هو رجع امبارح الساعة كام
قالت نور
بدري
قالت بسرعة
كذاب
أنا شافته بعيني بعد العشا بساعة واقف مع واحدة قدام محل الدهب
أنا خوفت عليكي عشان كده جيت أجري
نور سألتها
إنتي متأكدة
قالت وهي بتحلف بالله
والله العظيم لو مش متأكدة مكنتش فتحت بقي
أنا كنت واقف ورا الباب وابتسمت لأول مرة
لأن امبارح أصلا كنت مسافر مع مدير الشغل في مأمورية ورجعت بعد الفجر
ومعايا أوراق مختومة وتذاكر الطريق وكل زمايلي يقدروا يشهدوا
يعني أول كدبة وقعت
نور قالت لها
طيب يمكن كان شبهه
ردت بعصبية
هو أنا معرفش جوز أختي
ده أنا شوفته كويس
وبعدين اسمعي مني
أوعي تخليه يضحك عليكي
الرجالة كلها كده
واحد زي أحمد أول ما يزهق منك هيدور على غيرك
فضلت تزود في الكلام وتحط سم في ودنها
لحد ما نور قالت الجملة اللي اتفقنا عليها
أنا تعبت يا سارة
يمكن فعلا الحل إني أطلب الطلاق
فجأة وش سارة نور بطريقة غريبة
ابتسامة صغيرة ظهرت على طرف بقها بسرعة واختفت
لكن أنا شفتها
وساعتها اتأكدت إن الموضوع أكبر من مجرد غيرة
خرجت من ورا الباب مرة واحدة
الاتنين اتفزعوا
بصيت لسارة وقلت
يعني أنا كنت واقف مع واحدة امبارح
قالت وهي ارتبكت
أيوه
طلعت الورق من جيبي وحطيته قدامها
بصي
دي مأمورية شغل خارج المحافظة من امبارح الصبح لحد الفجر
