قهوة مُرة للكاتبة نرمين عادل همام

اكتشفت الكارثة… اكتشفت إن عمر كان بيصرف على حياته التانية دي كلها من فلوسي أنا. شقة ياسمين، الهدايا اللي كان بيجيبهالها، مصاريف المستشفى وقت ولادتها، وحتى كل قرش اتصرف على ابنه آدم… كل ده كان بيخرج من حساباتي البنكية اللي كنت سايباهاله يديراها وكنت فاكرة إنها مخصصة لاستثماراتنا ومستقبلنا سوا ما كل الفيز معاه وكمان توكيل. 

بس كل ده كوم، واللي شفته بعد كده كوم تاني خالص. الصدمة الحقيقية اللي كسرتني بجد كانت الملف اللي ياسمين لقته على اللاب توب بتاعه.

ملف كامل متسمي باسمي. سلمى.

الكاتبة نرمين عادل همام

جوه الملف ده، لقيت صور ليا وأنا منهارة وببكي بهيستيريا بعد ما سقطت وخسرت حملي التاني. لقيت سكرين شوت لرسايل غاضبة ومجنونة كنت ببعتهاله بعد ما يختفي بالأيام وميردش عليا، ومقاطع فيديو ليا وأنا بصرخ وبشد في شعري وقت خناقاتنا الكبيرة.

كل حاجة كانت محفوظة بعناية شديدة ومترتبة بتواريخ. والأبشع من كده، إن المقاطع دي كانت متقصقصة ومتمنتجة بحرفية مرعبة. متقصقصة بحيث إني أظهر دايما في صورة الست المجنونة، المختلة، اللي بتصرخ من غير سبب واللي مفيش حد يقدر يعيش معاها.

قعدت قدام المقاطع دي لساعات طويلة، وأنا حاسة بغثيان وقرف وكنت هأرجع. المحامي بتاعي بعد ما شاف جزء منها قالي بذهول، الراجل ده كان بيبني قضية ضخمة ضدك بقاله سنين، ده كان بيجهز لإعدامك حرفيا.

غمضت عيني للحظة ودموعي نزلت بصمت. حتى ضعفي، حتى وجعي وانهياري على ابني اللي مات، حوله لسلاح عشان يذبحني بيه.

أما ياسمين، فبدأت هي كمان تتغير وتتحول لنسخة تانية. في الأول كانت بتترعش زي الورقة كل ما حد يجيب سيرة عمر أو ينطق اسمه، بس شوية بشوية بدأت تتكلم وتخرج كل اللي جواها.

حكتلي إزاي اتعرف عليها في الشركة، وإزاي رسم عليها دور الزوج المقهور، وأوهمها إنه عايش جوازة باردة وميتة وإنه مش لاقي أي راحة ولا حب في بيته. حكتلي إزاي فضل يزن على ودانها ويقنعها إن جوازهم في السر ده فترة مؤقتة، وإنه هيعلن للدنيا كلها أول ما الظروف تهدى وتسمح.

وبعدين اعترفتلي بحاجة خلتني أحس بمرارة غريبة في حلقي ووجع ملوش وصف. قالتلي وهي باصة للأرض، أنا كنت بصدقه دايما يا سلمى… حتى في الأوقات اللي كان بيختفي فيها بالأيام ومبيردش على تليفوناتي، كنت بصدق أعذاره وحججه الكدابة.