عزومة

ـ “كل قرش هيتاخد مني للست دي نفقات وأحكام محاكم، هيكون على حسابك أنتِ وعلى حساب دلعك ومستقبلنا سوا. أنا ماسكها من إيدها اللي بتوجعها ومفهمها إن الدنيا هادية ومفيش حاجة، عشان أقشر منها وأجمع قرشين وأمّن نفسي الأول قبل ما أرميها وأدخل في معمعة القضايا.. أنا صابر عليها بالعافية والله يا نادين عشان خاطر ما تدمرنيش مادياً، لكن قلبي وعقلي وروحي ما فيهومش غيرك يا أميرة قلبي.
سمعت كلامه.. ودمي اتجمد في عروقي. ما كانش بس خاين، أكل عيشه وراحتي وكرامتي في حسابه..
الدموع اللي كانت محبوسة في عيني اتجمدت.. الخوف والوجع والكسرة، كل ده اتمسح في ثانية واحدة وحل مكانه جبل من التلج والغل. البني آدم اللي واقفة ورا الباب بسمع كلامه ده مش جوزي، ده شخص غريب، حاسبها بالقرش وبالورقة والقلم، شايفني مجرد حصالة وعائق مادي في طريق سعادته ودلعه!
سحبت نفسي لورا بخطوات بطيئة جداً ومن غير ما أطلع أي صوت. قفلت الباب الموارب بالراحة، ونزلت على السلم وأنا مسنودة على الحيطة.. مش ضعف، لأ.. ده كان ثبات الهدوء اللي بيسبق العاصفة.
أول ما طلعت الشارع، أخدت نفس عميق حسيت بيه بيحرق صدري، وطلعت موبايلي من الشنطة. إيدي ما كانتش بتترعش خلاص. فتحت الشات بيني وبين سلفتي اللي بعتتلي الرسالة، وكتبتلها جملة واحدة:
ـ “شريف معاه مين جوه يا ندى؟”
ما كملتش دقيقة ولقيت التليفون بيرن، ردت عليا بنبرة متوترة وفيها شفقة استفزت كل خلية فيا:
ـ “إلفت؟! انتِ فين؟ أنا أسفة والله يا أختي إني صدمتك، بس ما قدرتش أسكت أكتر من كده وأنتِ عايشة في مية اللفت وعاملة طيبة وعبيطة مع الكل.. شريف متجوز نادين، بنت خالة أمه، جايبها هنا من 4 شهور بعلم حماتك وأمه هي اللي مجهزة الشقة ومفهمة الناس كلها إنك اطلقتي!”
ابتسمت بسخرية، ابتسامة مرار حقيقية، وقلتولها بصوت هادي يرعب:
ـ “بعلم حماتي؟ حلو أوي.. يعني الفيلم ده كله كانوا متفقين عليه ومخرجينه سوا؟”
ـ “اه والله يا إلفت، وحماتك سافرت البلد مخصوص عشان تفضيلهم الشقة ويعيشوا أيام العسل.. شريف متفق مع أمه إنه يطفشك ويركبك الغلط عشان تتنازلي عن كل حقوقك، أو تمشي من سكات من غير ما تطالبيه بجنيه قائمة ولا نفقة!”
أول ما سمعت كلمة “القائمة والنفقة”، افتكرت كلامه جوه وهو بيعد على صوابعه وخايف على فلوسه ومستقبله مع الهانم.
قفلت المكالمة مع ندى من غير ما أرد، وبصيت لشباك الشقة فوق.. وقررت إن اللعبة دي أنا اللي هكتب نهايتها، وعلى طريقتي.