ج الاخير اول يوم في قبض المعاش
ج الاخير
بصيت له ببراءة وقلت:
— طيب ومصاريف كوتشات عربية محمد ابن أخوك؟ دفعتهم له ولا لسه؟
وش حسن اصفر، وقال بصوت واطي:
— اتحججت له إن الفلوس في البنك ومش هعرف أسحب النهارده.. الست زعلت ومحمد اتضايق مني وقال لي “أنا كنت فاكر عمي ضهري”! تخيلي يا منى؟ بعد كل اللي دفعتوه في شقته وجوازته، زعلان عشان خمس تلاف جنيه!
قلت بابتسامة ساردة:
— سبحان الله! يعني زعلوا منك وأنت مديهم المعاش كله؟ أمال لو ما كنتش اديتهم حاجة كانوا عملوا إيه؟ شفت بقى إن اللي يعوّد الناس على الشحاتة من جيبه، أول ما يقفل الجيب يعتبروه خاين؟
كريم اتدخل وصوته بدأ يعلى:
— يا ماما سيبك من عمي ومحمد دلوقتي! أنا البنك بعت لي رسالة تهديد بإيقاف الفيزا وغرامة تأخير لو مادفعتش الخمس آلاف جنيه بتوع الأقساط قبل الساعة اثنا عشر بالليل! أنا مرتب شغلانتي الم المتبقي منه ألفين جنيه بس.. سلفيني الثلاث آلاف دول من معاكِ وأنا هسدهم لك الشهر الجاي!
بصيت لكريم بعيون ناشفة تماماً:
— أسلفك؟ ومنين يا كريم؟ أنا مش قلت لك إني عملت بالفلوس شهادة استثمار مقفولة؟ وبعدين أنت شاب مسؤول، لما تشتري حاجات بالفيزا أكبر من طاقتك عشان تتمنظر قدام زمايلك، يبقى لازم تظبط أمورك بنفسك. سدد الألفين اللي معاك، وتفاوض مع البنك على الباقي.. اتعلم تصرف على قد جيبك.
كريم وقف بذهول:
— اتعلم تصرف على قد جيبك؟! إنتِ بتتكلمي معايا كده يا ماما؟ إنتِ عمرك ما ردتيني في جنيه!
قلت له بمنتهى القسوة الواعية:
— لأني كنت غلطانة. لما كنت برحمك من عواقب قراراتك الطائشة، كنت بطلعك راجل مش حاسس بقيمة القرش، ودليل كده إنك إمبارح كنت بتوزع معاش أبوك على عمتك وأنت مش معاك تسدد فيزتك! ادفع تمن رجولتك المزيفة بقى.
كريم اتصدم، وساب الصالة وخرج بره الشقة خالص ورزع الباب وراه برجة هزت الحيطة.
حسن قعد جنبي، وكان شكله كبر عشر سنين في يوم واحد. بص لي وقال بصوت مكسور:
— منى.. أنا عارف إنك زعلانة.. وعارف إن القرار كان مفاجئ.. بس أنا أخويا الكبير وصاني على بيته قبل ما يموت.. أنا ما قدرش أرجع في كلمتي قدام أم محمد وأقول لها مش هديكم المعاش.. شكلي هيبقى إيه قدام العيلة؟
قمت وقفت من جنبه، وبصيت له من فوق:
