خدمة برتبة زوجة ج 1 حكـايات مني السيد

خرجت ووقفت في الصالة تحت، وعمي كان قاعد وراها، ونورا كانت واقفة ساندة ضهرها على الحيطة وعاملة نفسها بتنهج وتعبانة.
حماتي بصتلي وبصت للشنطة الكبيرة اللي في إيدي، وشها احتقن بالغل وقالت بصوت عالي سمعه السلم كله رايحة فين يا ست هانم؟ رايحة تشهري بينا عند أهلك؟ فاكرة إن ليكي رجوع هنا تاني بعد كسر كلمتي؟ اطلعي برة يا خايبة، بكره ابني يتجوز سيد سيدك، واحدة من توبنا وتعرف الأصول وتعرف تشيل حماتها فوق راسها!
وقفت على آخر درجتين في السلم، وبصيتلها في عينيها مباشرة. كنت حاسة بهدوء غريب، هدوء ما بعد المعركة ابنك ده… اللي إنتي فاكراه دهب مصفى، أنا اللي كنت صابرة على عيوبه ومراره سنة ونص. اتجوزيهوله يا حاجة، جوزيهوله وخلي اللي هتيجي دي تشيل البيت. بس افتكري كلمتي دي كويس البيت اللي مفيش فيه عدل، ومبني على كسر خواطر البنات، مش هيعمر. ويوم ما تحتاجي كوباية مية وانتي نايمة في فرشتك، مش هتلاقي إلا العقارب اللي بتدلعيهم النهاردة عشان يلدغوكي بكرة.
بصيت لنورا اللي وشها اتخطف واتلجمت مبقتش عارفة ترد، وبصيت لعمي إسماعيل مع السلامة يا عمي، حقك عليا لو قصرت في حقك، إنت الراجل المحترم الوحيد في العمارة دي.
وسحبت شنطتي وفتحت بوابة العمارة، وخرجت للشارع.
الشمس كانت حامية، وهوا الشارع دخل صدري كأنه أول نفس نقي أتنفسه من شهور طويلة. رجلي كانت بتسحب الشنطة على الأسفلت، صوت العجل كان بيعمل شخشخة عالية، والناس في الشارع بتبصلي، بس مكنش هاممني. كنت حاسة بجسمي خفيف، كأن جبل كان محطوط فوق كتافي واتشال في لحظة واحدة.
مشيت لحد أول الشارع، وشاورت لتاكسي. ركبت، والسواق بصلي في المراية وسألني على فين يا أنسة؟
الكلمة رنت في ودني يا أنسة. ابتسمت ابتسامة صغيرة باهتة وقولتله على مصر الجديدة يا أسطى… على بيت والدي.
طول الطريق، التليفون مهدأش. رنات ورا رنات أمي، أختي الكبيرة، وحتى طارق رن مرتين وقفل. مردتش على حد. كنت محتاجة أجمع أفكاري. أنا مش رايحة بيت أهلي عشان أنهار وأعيط وأستنى وسايط وصلح. أنا رايحة وأنا عارفة إن دي مش نهاية العالم، دي بداية معركة تانية خالص معركة إثبات الذات، واسترداد حقوقي اللي اتسلبت مني باسم الأصول والعشرة.
وصلت العمارة بتاعة أهلي. طلعت الأسانسير، ووقفت قدام الباب وأنا باخد نفس عميق، ورنيت الجرس. فتحتلي أمي، وأول ما شافتني بالشنطة لطمت على وشها بصوت واطي يا دي المصېبة! عملتيها يا هدى؟ سيبتي بيتك وجيتي؟ ېخرب بيت عقلك، أبوكي جوة هيجراله حاجة!
زقيت الشنطة بهدوء ودخلت، وقفلت الباب ورايا مفيش مصېبة يا ماما. المصېبة كانت هتحصل لو فضلت هناك وقبلت أكون مداسة. وبابا مش هيجراله حاجة لما يعرف إن بنته اختارت كرامتها.
أبويا خرج من أوضة المكتب بتاعته، لابس نظارة القراءة وماسك الجورنال. بصلي، وبص للشنطة، وبص لأمي اللي كانت عمالة تلف حوالين نفسها وتندب. قلع النظارة بهدوء وقال بصوته الرخيم الدافي تعالي يا هدى. تعالي يا بنتي اقعدي جنبي.
روحت قعدت جنبه على الكنبة، وأول ما حط إيده على كتفي، الحصون اللي كنت بانيها كلها اڼهارت. ارتميت في حضنه وعيطت. عيطت مش عشان ندمانة، عيطت عشان التعب، عشان الإهانة، عشان سنين المشاعر اللي اتبعترت على أرض متستاهلش. أبويا فضل يطبطب على ضهري من غير ما ينطق بكلمة، لحد ما هديت تماماً.
احكيلي يا بنتي… من غير ما تخافي من حاجة. بيت أبوكي مفتوحلك، وعمري ما هقبل ليكي المڈلة عشان