خدمة برتبة زوجة ج 1 حكـايات مني السيد

بنبرة أهدى شوية فايزة أم، وليها حق الهيبة في بيتها، حتى لو غلطت في أسلوبها، الكبار لما يغلظوا، الصغيرين يطاطوا لحد ما الموجة تعدي. وإنتي عارفة طارق، دمه حامي وبيحب أمه لدرجة الهوس، لما سمع الكلمة اټجنن.
الموجة دي لو طاطيتلها النهاردة يا عمي، هتدوس على رقبتي بكرة. قولتله بحسم أنا طاطيت سنة ونص. طاطيت لما مفتاح شقتي كان بيتفتح من غير استئذان، طاطيت لما أهلي كانوا بيجوا يزوروني وتفضل حماتي قاعدة معانا متحركش كأنهم داخلين عليها هي مش عليا، طاطيت لما مصروفي كان بيتحاسب بالجنيه عشان طارق ميبقاش مقصر في حق البيت تحت. كل ده وقولت معلش، دول أهله وعيلته. إنما أتهان في صحتي وكرامتي ومطلوب مني أنزل أبوس الراس عشان أستسمحهم يخلوني خدامة؟ ده اللي مش هيحصل يا عمي، حتى لو كان التمن هو طلاقي.
الحاج إسماعيل اتنهد تنهيدة طويلة، وقام وقف يعني ده آخر كلام عندك يا هدى؟ مفيش نزول؟
أنزل أسلّم على حضرتك، وأقعد باحترامي في بيتك كمرات ابنك، أه. إنما أنزل أعتذر عن حاجة مغلطتش فيها، وأقف أفرك المطبخ تحت الذل؟ لا يا عمي، رجلي مش هتعتب السلم لتحت إلا وأنا عزيزة ومحترمة.
بصلي بنظرة غامضة، معرفتش هي احترام لقوتي، ولا زعل على عنادي. طبطب على كتفي بخفة وقال ربنا يهدي النفوس يا بنتي. خليكي في شقتك، وماتخرجيش منها. وأنا هشوف الحكاية دي هتخلص على إيه.
نزل عمي، وقفل الباب وراه. رجعت للصمت تاني. بس المرة دي، حسيت إن فيه شرخ كبر أوي تحت، وصوت الزعيق بدأ يعلى من جديد في شقة حماتي.
روحت وقفت جنب باب الشقة الموارب في الصالة عشان أسمع. صوت حماتي كان حاد ومجلجل، بتصرخ وتقول للحاج إسماعيل بقى البت دي تقعد فوق وتتشرط عليك يا حاج؟! بتقولك مش هتنزل إلا وهي عزيزة؟! دي طالقة لسانها على الكل! قولتلك من الأول جوازة فقر، بنت موظف غلبان عينيها فارغة ومصدقت لقت عيلة وعز! البت دي لو مكسرتش مناخيرها النهاردة، هتسوق طارق وتطردنا إحنا من بيتنا بكرة!
وسمعت صوت طارق، صوته كان متشنج، كأن أمه بتسخنه زي الڼار اللي بتتحط تحت الزيت أنا قولتلك يا أمي، والله ما هتبات في البيت ده إلا لو نزلت وباسِت إيدك ورجلك قدام الكل، وإلا ورقتها توصلها بكرة الصبح!
وسمعت صوت سلفتي نورا، النبرة المايصة الخبيثة اللي بتعرف تزرع بيها السم في العسل يا طارق يا حبيبي اهدا بس عشان صحتك، هدى طيبة بس تلاقيها نفسيتها تعبانة عشان ربنا لسه مأكرمهاش بالخلفة وشافتني حامل، عشان كده اتعصبت.. معلش اعذرها يا اخويا.
أول ما سمعت جملة نورا دي، حسيت بڼار ولعت في نافوخي! بتضربني في نقطة الخلفة؟! أنا وطارق متجوزين بقالنا سنة ونص، وروحنا للدكاترة وقالوا مفيش أي مانع طبي، مجرد وقت ورزق من عند ربنا! تقوم هي مستغلة اللحظة دي عشان تطلعني غيورة وحقودة وعيني فيها من حملها؟!
الخبث واللؤم ده مكنش ينفع يتسكت عليه. الحړب دلوقتي مبقتش حرب مين يغسل المواعين ومين ينضف السلم… الحړب بقت على شرفي، سمعتي، ونوايايا قدام الراجل اللي سلمته نفسي واسمي!
رجعت لورا، دخلت أوضة النوم، وسحبت شنطة السفر الكبيرة من فوق الدولاب. فتحتها على السرير ورزعتها. بدأت ألم هدومي… مش باڼهيار، ولا بعياط، بتركيز شديد ودقة مرعبة. حطيت عباياتي، طُرحي، أوراقي الشخصية شهادة تخرجي، قسيمة الجواز الأصلية اللي كانت معايا في الدرج، الذهب بتاعي كله اللي اشتريته بشقايا وشبكتي