ج1 حكايات بسمة
ج1
أحمد أخد نفس عميق، وحاول يلم الليلة بسرعة، مسك إيدي بنعومة مفاجأة، اتغيرت نبرته من العصبية للرجاء:
— يا ندى… يا حبيبتي، إحنا بيننا بيت وعشرة وأربع سنين. بلاش يدخل بيننا أوراق وقضايا. أنا مقلتش مش هرجعلك حقك، بس سمر أختي، ومكانش ينفع أسيبها من غير حاجة تأمنها، الشقة دي باسمها آه، بس أنا هكتبلك وصلات أمانة جديدة بالحق كله وهسددهولك على أقساط، بس بلاش تخربي البيوت.
أخت أحمد، سمر، طلعت صوتها وأخيراً وهي بتشهق:
— إنتي عايزة تاخدي الشقة مني؟ دي فرحتي الأولى! أنا مصدقت بقيت صاحبة ملك! أحمد هو اللي جابهالي، هو اللي قالي دي هديتك مني ومن أمي عشان مفيش حد يكسر عينك بعد كدة!
بصيت لسمر بوجع دفين، بس مبينتوش، وقلت:
— أخوكي جابهالك بفلوس عقري، بفلوس الهدوم اللي مكنتش بشتريها، بفلوس الخروجات اللي كنت بلغيها، بفلوس صحتي وعرقي في شغل المبيعات طول أربع سنين. أخوكي ما جابلكيش شقة من جيبه، أخوكي سرقني وعطاكي!
حماتي قربت مني بتهديد، وعينها بتطق شرار:
— سرقك إيه يا قليلة الأصل؟ الفلوس اللي دخلت بيت ابني بقت ملكه، وهو الحر يتصرف فيها زي ما هو عايز! وإذا كان على الورقة دي، فبليها واشربي ميتها، روحي للمحاكم وورينا هتطلعي بإيه من راجل مفيش في حسابه غير مليمين! الشقة خلاص اتسجلت باسم سمر شهر عقاري، والفلوس كاش راحت للمقاول، قاضيه بقى وعيشي في المحاكم عشر سنين!
ضحكت بصوت عالي، ضحكة رنت في صالة الشقة، أحمد بصلي بقلق، لأنه عارف إني لما بضحك في الموقف ده، بكون مرتبة حاجة أكبر بكثير من توقعاتهم.
وقفت وربعت إيدي:
— مين قال إن الشقة باسم سمر بس؟ إنتي فاكرة إني اتفاجأت بوجود العقد في درج المطبخ إمبارح بالصدفة؟ لا يا حماتي… أنا لما لقيت العقد، قلبت صفحاته كلها، مش بس مقدم الحجز.
أحمد وشه اتقلب تاني، وبص لسمر بسرعة:
— سمر… هو العقد كان فيه حاجة ثانية؟
سمر نزلت عينها في الأرض وبدأت ترتعش، حماتي صرخت فيها:
— في إيه يا سمر؟ انطقي! الورق اللي في الشقة ده ورق إيه؟
رديت أنا بدالها:
— العقد اللي سمر شايلاه في المطبخ، مش عقد شراء بس… ده عقد تنازل ورهن. أخت جوزي العزيزة، كانت واخدة القرض الكبير بتاع مقدم الشقة، بضمان شقة أمك القديمة! أمك التانية اللي بايعة بيتها رهناً للبنك عشان تكمل تمن الشقة الجديدة باسم سمر، وأحمد هو الضامن الضامن الأول في البنك!
