ثمن الجدعنة حكايات نرمين عادل همام

ريحة الديتول والمطهرات في أوضة مستشفى الشروق التخصصي كانت خانقاني وقافلة نفسي، بس بصراحة المرارة اللي كانت بتغلي في دمي كانت أقوى من أي حاجة. كنت واقفة جنب سرير الحاجة صفية، بتابع وشها المخطوف وعينيها اللي بدأت تفتح واحدة واحدة وهي بتفوق من البنج. الست دي كانت فاكرة إن اللعبة خلصت، وإنها خلاص خدت كليتي وبقيت أنا حتة خردة ملهاش لازمة، وهي اللي هتقوم وتعيش وتتنطط بصحتي. بصوت مبحوح وناشف زي الأرض البور، رفعت صباعها اللي بيرتعش وشاورتلي على باب الأوضة. مفيش في عينيها ذرة رحمة ولا حتى كسوف، وقالتلي بقلب ميت، كتر خيرك أوي لحد كدة. إنتي عملتي اللي عليكي وزيادة، وطالما أخدنا الكلية يبقى دورك في المسرحية دي خلص. لمي كراكيبك وهدومك واطلعي بره عيلتنا. حسام ابني مقامه عالي، ويستاهل واحدة من مستواه، بنت ناس وذوات، مش حتة شغالة جبناها من الشارع عشان تخدمنا وتدينا حتة من لحمها وتغور في داهية. لفيت وشي بالراحة ناحية حسام. كان واقف متسمر في ركن الأوضة، وشه أصفر زي الليمونة وكأنه ميت. الصفار ده مكنش كسوف من قلة أصل أمه، لأ، ده كان رعب وخوف من إنها كشفت الورق بدري أوي. كان مستني أخرج من المستشفى دايخة وتعبانة عشان يمضيني على ورق التنازل عن نصيبي في الشركة، بس أمه بوظتله الخطة بغبائها وتسرعها. بصيتلهم هما الاتنين بهدوء، هدوء ما قبل العاصفة اللي هتهد المعبد على دماغهم بعد عشر سنين من الظلم والقهر. رجعت خطوة لورا، ومسكت شنطتي الجلد السودة بكل ثبات، فتحت السوستة وطلعت منها ورقة رسمية عليها ختم النسر من إدارة المستشفى وقسم زراعة الأعضاء. وبصوت واضح وقوي، صوت زلزل حيطان الأوضة، قلت، كلية إيه اللي بتتكلمي عنها يا حاجة صفية؟ ومين ضحك عليكي وقال لك إن كليتي بقت في جسمك أصلا؟ حسام عينيه برقت وبقت قد الفنجان، وقرب مني وهو بيبلع ريقه وبيقول، ياسمين.. إنتي بتخرفي تقولي إيه؟ العملية خلصانة بقالها ساعتين! ضحكت ضحكة كلها سخرية ووجع رنت في الأوضة كلها ورديت، عملية إيه يا أبو عملية؟ مفيش حاجة اتعملت يا حسام. أمك ضغطها عيلي الصبح من التوتر، والدكاترة طلعوها بره أوضة العمليات. وفي الوقت اللي إنت كنت واقف فيه على سلم الطوارئ، بتكلم نيفين الشاذلي وبتوعدها إنك هترميني في الشارع زي الكلاب، وهتطلقني بمجرد ما تاخدوا كليتي.. أنا كنت واقفة ورا الباب، وسجلت كل حرف طلع من بوقك. طلعت موبايلي وهزيته قدام عينيه. حسام اتخشب مكانه كأن حتة حديدة نزلت على نافوخه. كملت كلامي وعينيا بتطلع نار الانتقام العادل اللي كنت كاتماها، نزلت جري على قسم زراعة الأعضاء، وسحبت موافقتي وإقراري للأبد وبشكل رسمي ميخرش الماية. أمك خرجت من الأوضة متبنجة على الفاضي من غير ما حد يلمسها. كليتي لسة جوة جسمي بتنور، وأمك لسة بفشلها الكلوي اللي هيخليها تلف على متبرع تاني، بس المرة دي مش هتلاقي العبيطة اللي كانت بتفديكم بروحها ببلاش. الحاجة صفية صرخت صرخة مكتومة وهي بتحاول تتسند وتقوم على السرير، وإيديها بتترعش بعنف وهي حاطاها على جنبها اليمين، وقالت، كدابة! إنتي بتخوفيني وتلوي دراعي! يا حسام قول إنها بتكدب والنبي! كليتي جوة صح؟ حسام منطقش بحرف. كان عامل زي الفار المبلول، راح ناحية الشنطة اللي جنب السرير ومسك تقرير الدكاترة اللي بيثبت إن العملية اتلغت بناءً على طلب المتبرعة وكمان بسبب ارتفاع ضغط المريضة. بص لأمه برعب وانكسار وقال بصوت مهزوز، للأسف يا أمي.. كلامها صح.. العملية متعملتش وياسمين متبرعتش بحاجة. الكاتبة نرمين عادل همام الأوضة اتقلبت في ثانية لسيرك مجانين. الحاجة صفية بدأت تصرخ وتلطم على وشها، ونسيت خالص حوار الوقار والهانم اللي كانت بتعمله علينا، وبدأت تولول، يا لهوي! يا فضيحتي وسط قرايبي ومعارفي! عايزة تموتيني يا ياسمين؟ بتستخسري فيا حتة لحمة من جسمك؟ يا قاسية يا بنت الكلب يا جاحدة! قربت منها وبصيت في عينيها أوي، وقولت بلهجة تقطع المسمار، حتة اللحمة دي هي هي اللي قلتي عليها ريحتها كمكم وأرياف يوم ما أمي الغلبانة جابتهالك عشان تردي فيها وتطبخيها، وقمتي دلقتيها في الحوض قدام عيني! فاكرة ولا ناسيا يا حاجة؟ فاكرة لما كسرتي بخاطر أمي ووجعتي قلبها؟ أنا يومها حلفت ميت يمين إني هاخد حق كل دمعة نزلت من عينيها. والنهاردة ربنا جاب لها حقها لحد عندها. جسمي اللي بتقرفي منه محرم عليكي، وهو ده اللي كنتي هتعيشي وتتنفسي بيه. دلوقتي بقى خلي نيفين وفلوس أبوها المستثمر الكبير ينفعوكي ويشترولك كلية. حسام حاول يقرب ويمسك كتفي، وصوته بيترعش بتمثيلية المسكنة اللي حفظتها، ياسمين.. أبوس إيدك خلينا نقعد ونتفاهم. أنا كنت غبي وحيوان، والشيطان شاطر وضحك عليا. نيفين دي والله مجرد سبوبة ومصلحة عشان نكبر الشغل في السوق.. أنا مبحبش غيرك، دي بينا عشرة كفاح وتعب شقى سنين! رفعت إيدي في وشه زي العسكري وقولتله، إياك تفكر تلمسني! عشرة كفاح إيه يا أبو كفاح؟ إنت كنت بتعاملني زي المكنة اللي بتجيب فلوس ببلاش. عشر سنين بحالهم وأنا بشيل كراتين في مخازن العاشر من رمضان، وبظبطلك حسابات وضرايب، وبسهر للفجر عيني تطلع عشان أخلص الفواتير، وفي الآخر جنابك تروح تلبسلي ساعات غالية وتدفع فواتير أوتيلات وفنادق لنيفين هانم من شقايا وتتعشى معاها على حسابي؟ أنا مش بس سحبت كليتي يا حسام.. أنا سحبت عمري وحياتي كلها من سكتك. طلعت من الشنطة ملف مليان صور مطبوعة لكل التحويلات البنكية اللي سهرت انسخها امبارح بالليل، ورميتها في وشه عشان الورق يتنطور على سرير أمه وعلى الأرض. وقولتله، اتفرج يا باشا.. دي صور التحويلات اللي طلعت للشركة الوهمية اللي فتحتها في مدينتي عشان تغسل فيها فلوسنا. ودي فواتير الأوتيلات والمجوهرات اللي جبتها للست هانم. كل مليم سرقته من الشغل اللي كبرته معاك بدمي وصحتي متوثق هنا بالقرش. ومن بدري أوي المحامي بتاعي في المحكمة، بيرفع قضية فرض حراسة على الشركة، وقضية طلاق للضرر، ده غير طلب تعويض كامل وشامل عن كل سنين السخرة اللي اشتغلتهالك من غير ما أقبض جنيه. حسام رجع لورا خطوتين، والقناع اللي كان لابسه وقع خالص، وبان على حقيقته راجل أناني وصغير ومكسور، وقال، ياسمين، إنتي كدة بتخربيها! الشركة هتقع وتفلس! البنوك هتحجز على كل حاجة لو الشركا شموا خبر بالحسابات دي! رديت عليه ببرود الدنيا، تولع الشركة، ويولع حسام، وتولع الحاجة صفية فوقيكم! دي كانت آخر كلماتي ليهم. لفيت واديتهم ضهري بكل كبرياء، وسبت ورايا صريخ وعويل ولطام مابقاش يلزمني أسمعه. خرجت من باب الأوضة 504، وخطواتي على بلاط المستشفى كانت خفيفة كأني عصفورة بتطير، وكأن جبل هموم انزاح من على صدري للأبد. نزلت من المستشفى وأنا بتنفس حرية، وشاورت لأول تاكسي وقلتله طوالي على الإسماعيلية عند أمي. طول الطريق كنت ساندة راسي على الشباك وبتفرج على الشوارع وكأني بشوفها لأول مرة في حياتي. الشمس كانت طالعة ومنورة، والهوا كان بيدخل صدري نضيف ومفيهوش ريحة السموم والاستغلال اللي عشت فيهم. أول ما وصلت خبطت، وأمي فتحتلي الباب. ملامحها كانت دبلانة، وعينيها وارمة من كتر القلق والعياط من ساعة ما عرفت ميعاد العملية. بس أول ما شافتني واقفة على رجلي، وبصحتي، ومش لابسة لبس المستشفى، شهقت بصوت عالي وخدتني في حضنها وهي بتنهار من البكا. ياسمين! يا بنتي يا حبيبتي.. إيه اللي حصل؟ إنتي كويسة؟ عملتي إيه في كليتك؟ اترميت في حضنها، وسبت نفسي أعيط.. عيطت لأول مرة من سنين طويلة أوي، عيطت عشان أغسل كل لحظة ضعف، وكل إهانة ووجع شربتهم في بيت حسام وأمه. قولتلها من بين دموعي، أنا كويسة وزي الفل يا أمي. كليتي لسة فيا، ورجعتلك سليمة غانمة. ربنا نجاني من ولاد الحرام دول. قعدت معاها على الكنبة، وسردتلها الحكاية من طقطق لسلامو عليكو، من أول مكالمة حسام ونيفين على السلم، لحد ما كشفت السرقة والورق، ولحد اللحظة اللي الحاجة صفية طردتني فيها وهي فاكرة إنها خدت اللي هي عايزاه. أمي كانت بتسمعني وعينيها مبرقة من الصدمة والذهول، وبعدها رفعت إيديها الاتنين للسما، وبصوت مليان شكر ودموع قالت... أمي خدتني في حضنها أكتر ومسحت على شعري وقالت بدموع الفرحة، الحمد لله يا بنتي، ألف حمد وشكر ليك يا رب إنك كشفتهم على حقيقتهم قبل ما ينهشوا في لحمك ويشربوا دمك. الحمد لله اللي ردلي اعتباري في بنتي وصحتها وعوضني خير. دمعتي اللي نزلت وأنا بمسح السلالم وأنضف وراهم ماراحتش هدر، وربنا جابلي حقي لحد عندي. في الليلة دي، دخلت أوضتي القديمة، ونمت في سريري القديم جنب أمي، حسيت بأمان وراحة بال ودفى مدقتوش طول العشر سنين اللي عشتهم في قهر وجوازة كلها استغلال. معداش غير يومين بس، وبدأت الحرب الحقيقية تدق طبولها. حسام كان هيتجنن، الموبايل مابطلش رن، مئات المكالمات، ورسايل كتير ورا بعض، شوية يتمسكن ويستعطفني، وشوية يهدد ويتوعد، بس أنا كنت أبرد من التلج، وعملتله بلوك من كل حتة ومسحت رقمه من حياتي. وفي اليوم التالت، خدت الأستاذ طارق، المحامي بتاعنا وهو راجل قدير وصديق قديم لعيلتنا، وروحنا على مقر الشركة في العاشر من رمضان. أول ما دخلت من باب الشركة، الموظفين كلهم كانوا بيبصولي بصدمة وشفقة وفي نفس الوقت مستغربين. دخلت بخطوات واثقة طوالي على مكتبي القديم، وقعدت ورا الكمبيوتر الرئيسي بتاعي. محدش فيهم قدر يفتح بقه ولا يمنعني، لأنهم كلهم عارفين ومتاكدين إني أنا العقل المدبر والدينامو اللي ممشي كل حاجة في المكان ده. دقايق بالظبط، ودخل حسام وهو بيجري وبينهج، وكان معاه المحامي الملاكي بتاعه. كان لابس نفس الساعة الغالية اللي جابها من شقايا، بس وشه كان مخطوف وعينيه غايرة لجوة من قلة النوم والتوتر. ياسمين! إنتي جاية تهببي إيه هنا؟ المكان ده مابقاش ليكي أي علاقة بيه بعد القضية اللي رفعتيها دي! الأستاذ طارق وقف بوقار، وبنبرة هادية بس تقطع زي السيف قال، أهلاً يا أستاذ حسام. موكلتي الأستاذة ياسمين موجودة هنا بصفتها الشريك الفعلي بنسبة النص في الأصول الإدارية، وبصفتها المسؤولة الأولى عن النظام المحاسبي للشركة. وإحنا قدمنا طلب رسمي عاجل للمحكمة بفرض الحراسة القضائية على الشركة، وده بناءً على مستندات وورق يثبت اختلاسك لأموال الشركة، وتحويلك مبالغ لحسابات شخصية وشركات وهمية بهدف الإضرار بمال الشراكة. الكاتبة نرمين عادل همام حسام بص لمحاميه وهو بيترعش وكأنه بيقوله إلحقني، فالمحامي بتاعه أتقدم خطوة وقال بثقة مصطنعة، يا فندم الكلام ده ملوش أي أساس من الصحة، الشركة متسجلة في الورق الرسمي باسم الأستاذ حسام بالكامل. الأستاذة ياسمين مجرد زوجة كانت بتنزل تساعد جوزها مش أكتر، ومفيش أي عقد شراكة رسمي يثبت إن ليها مليم واحد هنا. ابتسمت ابتسامة كلها سخرية، وفتحت اللاب توب بتاعي ولفيت الشاشة ناحيتهم وقولت، كلامك مظبوط.. في الورق بس الشغل كله باسم حسام. لكن الشراكة الفعلية في القانون بتثبت بشراكة العمل والجهد والمساهمة المالية. أنا معايا تحويلات بنكية متوثقة من حسابي الشخصي القديم، من فلوس ورثي من أبويا الله يرحمه، اللي بدأت بيهم الشركة دي مع حسام لما كان المحل لسة حتة أوضة إيجار بـ 500 جنيه. ده غير إن عندي سجلات ودفاتر بخط إيدي توضح إدارتي لكل الحسابات بالقرش، وشهادة العمال والموظفين اللي واقفين برة دول كلهم إنهم مكانوش بيقبضوا ولا بيعملوا أي حاجة إلا بأمر وتوقيع مني. والأهم من كل ده.. أنا عندي تسجيلات وإيميلات متبادلة بيني وبين كبار العملاء تثبت إني كنت شريكة القرار وصاحبة الكلمة الأولى هنا. حسام وشه جاب ألوان وبدأ يتصبب عرق، كان عارف ومتاكد إن الورق ده لو وصل للضرايب أو الشركا الكبار، دي هتكون نهايته في السوق للأبد. وإحنا واقفين في المكتب والتوتر واصل لآخره، موبايل حسام رن. كان المتصل كمال بيه الشاذلي، أبو نيفين والمستثمر التقيل اللي حسام كان بيبني عليه كل أحلامه عشان ينقذ الشركة ويدخل بيه وسط الحيتان وناس المجتمع الراقي. حسام رد بصوت بيترعش ومهزوز، أيوة يا كمال بيه.. أهلاً بحضرتك يا فندم. صوت الراجل كان عالي جداً ومليان غضب، لدرجة إننا كلنا في الأوضة سمعناه وهو بيزعق ويقول، حسام! إيه الهباب والفضايح اللي واصلاني دي؟ بنتي نيفين جاية منهارة وبتعيط وتقولي إن مراتك كشفت علاقتكم، وإن في قضايا اختلاس وفضايح مالية مرفوعة عليك وهتوصل للنيابة؟ إنت كنت بتستغفلنا وتضحك علينا وتقول إنك أعزب وبتخلص ورق طلاق من زوجة مريضة؟ أنا فلوسي وسمعة بنتي واسمي في السوق مش لعبة في إيد واحد زيك! الصفقة اللي كانت بينا ملغية ومفيش شغل، وأي مليم دفعتهولك كعربون لشرا الحصة، أنا عاوزه يرجعلي بكرا الصبح على طرابيزتي، وإلا ورحمة أبويا هسجنك وأشردك! حسام وقع على الكرسي وكأن روحه اتسحبت منه، وقال بصوت ضايع، كمال بيه.. أرجوك اسمعني، دي مؤامرة من طليقتي عشان تدمرني وتوقعني.. بس الخط كان قطع، والراجل قفل في وشه. حسام لف وشه ناحيتي، وعينيه كانت بتطق شرار وغل وحقد وقال، خربتي بيتي؟ ارتحتي كدة؟ ضيعتي عليا صفقة عمري اللي كانت هتنقلني في حتة تانية خالص! وقفت بكل شموخ، وقفلت اللاب توب بتاعي بالراحة، وبصيتله من فوق لتحت وقولت، الصفقة دي كانت مبنية على ج/ثتي وعلى حتة من لحمي يا حسام. إنت اللي خربت بيتك ودمرت نفسك بإيدك، لما افتكرت إن الطيبة والجدعنة غباء، وإن الست اللي شالتك وصانتك ملهاش تمن وببلاش. دلوقتي بقى وريني نيفين وباباها المستثمر هيعملولك إيه عشان ينقذوا شركتك اللي هتتشمع وتقفل خلال أيام معدودة. عدى شهر بحاله. القضايا كانت ماشية في سكتي زي الصاروخ وبصالحي تماماً، وده طبعاً بفضل شطارة الأستاذ طارق ودقة الورق والمستندات اللي كنت شايلاها. المحكمة حكمت بالحجز التحفظي على حسابات الشركة، واتفرضت عليها الحراسة القضائية، وحركة الشغل وقفت تماماً بعد ما كل الموردين رفضوا يتعاملوا مع حسام خوفاً على فلوسهم لتضيع. أما بقى الحاجة صفية، فحالتها الصحية اتدهورت ونزلت الأرض. غسيل الكلى المستمر كل شوية هد حيلها وكل من جسمها، ومفيش ولا مخلوق من قرايبها رضي يتقدم ويتبرعلها عشان خايفين من بهدلة العمليات، وحتى عيلة ولاد عمامها اتخلوا عنها وقطعوا معاهم بعد ما عرفوا بإفلاس حسام وفضيحته في السوق. في يوم، جالي تليفون من مستشفى الشروق التخصصي. الممرضة كانت بتكلمني بلهفة وبتقول، مدام ياسمين.. الحاجة صفية تعبانة جداً وحالتها متأخرة، وبتطلب تشوفك ضروري. عمالة تعيط وتقول عاوزة ياسمين تيجي تسامحني. روحت المستشفى، مش ضعف مني ولا قلة حيلة، لأ، روحت عشان أحط النقطة الأخيرة في كتاب العلاقة المسمومة دي وأقفل الصفحة للأبد. دخلت الأوضة، لقيت الحاجة صفية كشت وصغرت، وشها بقى مايل للسواد من كتر السموم اللي في دمها، وعينيها دبلانة ومكسورة. أول ما شافتني، حاولت تمد إيديها وتمسك إيدي وهي بتعيط بحرقة وبتقول، ياسمين.. يا بنتي.. سامحيني واعفي عني. أنا ظلمتك وجيت عليكي كتير. ربنا عاقبني وخلص حقي في الدنيا، وخلاني أحتاج الغسيل كل أسبوع ومحدش من دمي راضي يقف جنبي. حسام ابني اتدمر وشقاه راح، وإحنا بنموت بالبطيء يا ياسمين. سامحيني عشان ربنا يرضى عني ويشفيني. بصيتلها بهدوء شديد، وسحبت إيدي من إيديها بالراحة بس بحسم، وقولت، أنا سامحتك يا حاجة صفية على كل إهانة وجهتيهالي. وسامحتك على كل كلمة سم جرحتيني وكسرتي بخاطري بيها. ربنا هو اللي بيحاسب، وأنا مش هشيل غل وكره في قلبي يمرر عليا حياتي الجديدة. لكن المسامحة دي حاجة، والرجوع للغباء واستغلالي ده حاجة تانية خالص. كليتي مش هتتبرع ليكِ، وحياتي وعمري مش هيرجعوا لحسام تاني. تقدري تطلبي من ابنك يبيع الساعة الغالية اللي جابها من فلوس الشركة وعرقي عشان يعالجك بيها. خرجت من الأوضة وأنا حاسة بسلام داخلي وهدوء ميتوصفش. خلاص، كل الحسابات القديمة اتصفت وخلصت. بعد ست شهور كاملين من الشد والجذب في المحاكم، صدر الحكم النهائي اللي برد ناري الطلاق للضرر المحكمة حكمتلي بطلاق بائن للضرر، وخدت كل مستحقاتي الشرعية بالكامل، من مؤخر ونفقة متعة وصداق. شراكة العمل المحكمة أنصفتني وحكمتلي بنص قيمة أصول الشركة والمدخرات اللي في البنوك، بعد ما أثبتنا الشراكة الفعلية بالجهد والمال ومستندات الإدارة المالية. التعويض المحكمة ألزمت حسام يدفعلي تعويض مالي ضخم جداً عن كل سنين العمل الإضافي اللي اشتغلتها من غير أجر، وإدارتي للحسابات طول السنين دي. وطبعاً عشان حسام كان مفلس ومش قادر يسدد مليم، وبسبب قضايا التهرب الضريبي والاختلاس اللي النيابة العامة حركتها ضده بناءً على البلاغات والورق اللي اتقدم، صدر قرار ببيع مقر الشركة والمعدات كلها في مزاد علني عشان يسددوا الديون اللي عليه. الكاتبة نرمين عادل همام دخلت المزاد، واشتريت نصيب حسام كله، بالتعاون مع مستثمر جديد ومحترم كان مقدر عقليتي الإدارية وسمعتي الطيبة اللي بنيتها في السوق. الشركة كلها بقت تحت إدارتي الشخصية، بس المرة دي باسم جديد ومختلف تماماً، شركة ياسمين للتجارة والتوكيلات الصناعية. في الصبح اللي افتتحت فيه المقر الجديد لشركتي في منطقة راقية وحيوية في القاهرة، الدنيا كانت منورة قدامي وكأن الشمس طالعة تباركلي. كنت لابسة بدلة رسمية شيك جداً، بدلة بتعبر عن سيدة أعمال قوية اتولدت من رحم الوجع والمعاناة، ومبقتش ياسمين المكسورة بتاعت زمان اللي بترضى بالفتات. أمي كانت واقفة جنبي، منورة في طقم جديد وجميل اخترتهولها بنفسي، والابتسامة كانت مالية وشها وبتضحك من قلبها وهي بتمسك المقص وبتقص شريط الافتتاح. في اللحظة دي بالذات، شريط الذكريات مر قدام عيني، وافتكرت يوم حلة الشوربة اللي الحاجة صفية دلقتها في الحوض واستخسرتها فيها، وافتكرت كسرة قلبها ودموعها يوميها. قربت منها، وبوست راسها وإيديها قدام كل الحاضرين، من عمال وموظفين وعملاء جداد وشركاء. وقولت بصوت عالي وكله فخر، الشغل ده كله والنجاح ده ليكي وبسببك يا أمي. كرامتك وراسك المرفوعة قدام الدنيا كلها هي أغلى حاجة عندي في الوجود، وده أقل تعويض عن كل دمعة نزلت من عينك. الموظفين والعمال القدام اللي كانوا شغالين معانا في العاشر من رمضان، كلهم سابوا الشركة هناك وجم ورايا يشتغلوا معايا. نقلوا كلهم للمقر الجديد بمرتبات مجزية وحقوق كاملة من تأمينات وحوافز، لأنهم كانوا متأكدين وعارفين إن ياسمين هي اللي كانت دايما بتصون تعبهم وشقاهم، وعمرها ما كلت حق حد فيهم. أما بقى حسام، فنهايته كانت تليق باللي عمله فيا. حاله انتهى بيه غرقان لشوشته في الديون والشيكات، عايش لوحده في شقة إيجار صغيرة ومتبهدلة، بعد ما نيفين الشاذلي وأبوها رموه في الشارع واتخلوا عنه بمجرد ما فلوسه وشركته طاروا وهيبته الكدابة وقعت في الأرض. بقى كل يوم والتاني بيلف على المحاكم والنيابات، ومستني أحكام الحبس والتنفيذ تنزل على دماغه بسبب القروض اللي عجز يسددها والديون اللي كسرته. العبرة من القصة دي التضحية والاستحمال مش دايما بيكونوا دليل على الحب والأصل الطيب، بالعكس، ساعات بيكونوا هما البنزين اللي بيستخدمه الناس الأنانية عشان يحرقوا بيه كرامتك وصحتك وعمرك. الست المحترمة الجدعة مش هي اللي تسكت على الظلم وتطاطي راسها، قيمتك الحقيقية نابعة من جواكي إنتي، مش من إثبات نيتك الطيبة وجدعنتك لناس متستاهلش ومبيطمرش فيها. لما تقفي وتقولي لأ، وتحطي حد للاستغلال والقهر، ربنا بيفتحلك أبواب كرامة وعزة ونجاح عمرها ما كانت تخطر لك على بال، وبيعوضك عن كل وجع أضعاف مضاعفة. الكاتبة نرمين عادل همام تمت

مقالات ذات صلة

ج3 حق نفسي عليا بقلم نرمين عادل همام

ج1جوزي كلمني وهو بيبكي حكايات صافي هاني

ج1 حكايات صافي هاني

ج2 خطيبي حكايات روماني مكرم

المال الحرام ج 1 بقلم الكاتبة نرمين عادل همام

ج الاخير اخت مراتي

اترك تعليقاً إلغاء الرد