عروسة بالغلط بقلم انجي الخطيب
بابا كان جابهالي قبل ما يمـ,ـوت، وماما كانت دايمًا تقوللي إنه أغلى حاجة سابهالي، وعمرها ما سمحتلي أخلعها. ـ أيوه، مالها؟ هبة قالت بصوت مرتعش: ـ المفتاح اللي في السلسلة دي بيفتح صندوق صغير، والصندوق ده فيه الجواب الأصلي وأوراق الشراكة.
حطيت إيدي على فمي، وفضلت باصة لها وأنا مش مصدقة. ـ وإنتِ عرفتي الكلام ده منين؟ ـ بابا قاللي قبل ما يمـ,ـوت، وإن الصندوق اتساب عند والدتك أمانة. بعد وفاته، والدتك رفضت تسلمني أي حاجة، وقالتلي إنها هتحتفظ بيها لحد ما تكبري وتقدري تعرفي الحقيقة بنفسك.
كريم ضحك ضحكة عالية. ـ جميل! يعني بنت عماد معاها الورق، ومراته كانت مخبياه! طب ما نروح نجيبه ونخلص من الفيلم ده! سليم مسكه من دراعه بقوة. ـ محدش هيروح في حتة، ومحدش هيقرب من مريم ولا من أهلها. الورق ده مش هيتاخد بالعافية. كريم حاول يفلت منه.
الورق ده مش هيتاخد بالعافية. كريم حاول يفلت منه. ـ إنت اتجننت عشان بنت شوفتها من ساعتين؟! سليم سابه، وبصله بثبات. ـ أنا ممكن أختلف معاك في أي حاجة، لكن عمري ما هسمحلك تخوف واحدة ملهاش ذنب عشان تحقق مصلحتك.
بصيت لسليم، ولأول مرة حسيت إن كلامه مش مجرد استعراض قدام الناس. كان واقف فعلًا عشان يمنع أذى ممكن يحصل. لكن ده ما كانش معناه إني نسيت اللي عمله من ساعة ما دخل عليا الحمام!
لفيت ناحيته وقلت: ـ متشكرة إنك بتدافع عني، بس أنا مش محتاجة حد يقرر عني أنا هعمل إيه. أنا اللي هكلم ماما، وأنا اللي هعرف الحقيقة. هز راسه فورًا. ـ عندك حق. الرد البسيط ده خلاني أسكت. كنت متوقعة يجادلني أو يقوللي إنه أدرى مني، لكنه اكتفى بكلمتين.
سليم كمل: ـ خدي وقتك، وكلمي والدتك، ولو حبيتي ترجعي القاهرة دلوقتي، السواق هيوصلك لحد باب بيتك. ومحدش هنا هيضغط عليكي. كريم بصله باستهزاء. ـ يا سلام على الأخلاق! طب يا سيدي، ما دام إنت بقيت حامي حمى العيلة، خد بالك من نفسك.
لأن الموضوع مش هيقف عند جواب. وبص للحاج صبري وأضاف: ـ الخميس قرب، يا حاج. ولو الورق ما ظهرش قبلها، في ناس مش هتسكت. وبعدين خرج من الصالون، وساب وراه صمت تقيل. أنا فضلت واقفة مكاني، ومش عارفة أبدأ منين.
نوال قربت مني، ومسحت على كتفي وقالت: ـ يا بنتي، إنتِ لازم ترتاحي شوية. كل حاجة هتتحل بإذن الله. بصيتلها وقلت: ـ أنا لازم أكلم ماما حالًا. طلعت موبايلي، واتصلت بيها. أول مرة ما ردتش، والتانية كمان، لكن في المرة التالتة سمعت صوتها.
